Ata hoxe (Venres 25) non puiden facerme eco da nova, pero a pesar do contratempo (onte xa tivo lugar a primeira xornada) decidín publicala posto que hoxe existe unha nova oportunidade para acudir a ista charla. De 16:30 a 20:00 na Casa das Palabras. Verbum.
Un ano máis celebramos estas xornadas das mulleres veciñais de Vigo, e incrible dicilo, pero despois de 21 anos de xornadas atopámonos que as mulleres seguen estando nunha situación de desventaxa social. A pobreza aínda leva nome de muller.
Este ano a temática a tratar destas xornadas é “A conciliación laboral e familiar” pois en pleno 2013 seguen sendo as mulleres as quen teñen que conciliar. Nesta crise que agora vivimos son as mulleres as primeiras que marchan para a casa.
Nestas xornadas reinvidicamos o recoñecemento legal do dereito de mulleres e homes a teren as mesmas oportunidades e un acceso non discriminatorio a todos os ámbitos da vida, entre eles, o laboral. Para asegurar a igualdade de oportunidades e lograr a
igualdade efectiva compre un tratamento diferenciado para mulleres e homes que permita, mediante accións de discriminación positiva, acabar coas desigualdades en razón de xénero. Loitar pola defensa da igualdade na retribución, na promoción profesional, acceso o emprego, na formación é na conciliación da vida laboral e familiar.
Nestas xornadas queremos homenaxear a unha muller loitadora, Dona Josefa Martínez Alonso, que foi Presidenta da Rede de Mulleres contra os malos tratos. Persoa solidaria que merece sobradamente este recoñecemento.
