“Poesía cromática”, publicado por Belagua Ediciones, é o resultado dun proxecto artístico común entre o poeta Antonio García Teijeiro e o pintor Xulio García Rivas. Un libro especial, de pintura e poesía, que reúne 40 pinturas e 40 poesías creadas ao longo de dez horas, entre os anos 2014 e 2016.
Prologado pola poeta Eva Veiga, deste libro imprimíronse unicamente 200 exemplares, que se presentan ao público numerados e asinados polos seus autores.
“Poesía cromática”, reproduce os 40 orixinais, tal e como saíron das mans dos seus autores, sen correccións de ningún tipo, respectando a forza do inmediato, do espontáneo, case do automatismo, coa que eles mesmos traballaron. Unha publicación, en palabras dos autores, que leva consigo “o reto marabilloso de espertar emocións”.
