PACO NOGUEIRAS PRESENTARÁ ESTE DOMINGO AS CANCIÓNS DO LIBRO-DISCO “BRINCA VAI!” NA CLAUSURA DA FEIRA DO LIBRO DE VIGO
O músico Paco Nogueiras presentará este domingo 1 de xuño ás 19:00 horas, na Feira do Libro de Vigo (Praza de Compostela), o seu primeiro traballo discográfico propio, titulado “Brinca Vai!” e editado por KALANDRAKA en formato libro-cd-dvd. Tamén asistirá ao concerto o artista audiovisual vigués José Miguel Sagüillo, que dirixiu os vídeos musicais cos que se completa esta obra.
O libro-disco “Brinca Vai!” reúne doce cancións en galego dirixidas ao público infantil e familiar. As ilustracións, obra de David Pintor, permanecen expostas na libraría LIBROS PARA SOÑAR, onde se poderán visitar durante todo o mes de xuño.
Neste espectáculo, con entrada libre e de balde, Paco Nogueiras interpretará unha escolma deses temas, con música en directo.
Paco Nogueiras é o compositor e intérprete de todas as cancións de “Brinca Vai!”, nas que aborda materias incluídas no currículo escolar: a natureza, os xogos tradicionais, a importancia dos libros e da lingua galega, ou celebracións como o Entroido, o Nadal, o Magosto e o Samaín. Destaca tamén polo amplo abano de estilos musicais contemporáneos que abrangue, dende o rock ao reggae, pasando polo techno e a música electrónica, con influencias tradicionais.
Trátase dunha proposta lúdica e transgresora, que transmite bo humor, e que se complementa con imaxes cheas de colorido, expresividade e dinamismo. “Brinca Vai!” reúne lectura, expresión musical e corporal, creatividade artística e aprendizaxe global en clave de diversión.
MÁIS INFORMACIÓN DE “BRINCA VAI!” NA WEB DE KALANDRAKA
http://www.kalandraka.com/ga/coleccions/nome-coleccion/detalle-libro/ver/brinca-vai/
NA PÁXINA DE “BRINCA VAI!” EN FACEBOOK: http://www.facebook.com/BrincaVai
E NA PÁXINA www.brincavai.com
